Балада пра паэта
Я закахалася ў паэта
Вясновай цёплай раніцой.
Жыццё напоўнілася мэтай –
Кахаць паэта ўсёй душой.
Раптоўна я яго сустрэўшы,
Згубіла сорам і спакой.
Ён прысвячаў мне песні, вершы
І быў, як кажуць, толькі мой.
Паэт хадзіў, як здань, за мною.
І я хадзіла ўслед за ім.
Аднак, спазнаўшы горыч болю,
Расчаравалася зусім….
…………………………….
Я хутка бегла на спатканне,
Душа квітнела ад кахання.
Але… Спаткалася з бядою –
Ён цалаваўся не са мною.
Ад роспачы я ўся збялела,
Мой ветразь шчасця стаў збуцвелым.
Што засталося мне ад мэты?
Нянавісць, прыкрасць да паэтаў!!!
…………………………….
Шмат год мінула з той пары,
Змякчэў да творцы мой парыў.
І дзеці выраслі даўно,
Жыццё ж, няўзнак, нібы ў кіно:
Машыны, грошы, поспех, слава,
У вір жыцця кідаюць справы.
…І вось, вяртаюся з работы,
А ў лужыне мая турбота:
Ляжыць, мычыць, гарэлку глуша –
Агідна бачыць гэту тушу!
Я вам адкрыю свой сакрэт:
Маё няшчасце – мой паэт…